Няръяна Ӈэрм
Явм’ мадаби’’
Нара’ няна марыӈэ хэванда нерня Салехардахад Аксарка’ няю’ ӈэда талбэй сехэры’ сидя ядувна ты’’ хадырцеты’’. Ханяӈэхэна сидя няю’ ӈэдалёда машин’’ помна мерета «Буран»‘’ иртари’ ӈэдалёрцеты’’. Тикы’’ — пэ’’ тер’’, пыдо’ по’ сидя вэкна таня’ тэворцеты’’. Теда’ ӈод’’ ӈани’ тэтналыд’’. Саля’ яв’ салабам’ Пэ’’ няю’ мадабаӈгу’’. Хахаяда яля’ ӈоб’’ ӈэсын’ тэворӈаваць.
Время для чтения ~ 3 минуты
Сидя ӈарка мяк’ ӈарка пэдара’ хэвхана мярвэхэнзь. Хэвувнанди’ хой’ сюмб’’ ӈадиць, пэвсюмб’’ маханяна Харсаим’ харад’ лэё’’ ялкадарӈаць. Тыдо’ нё’ няюна хадырӈаць. Ӈопой няридо’, Александр Тайбери, ӈэвадёвысь. Мякана мале ядембада чайм’ ӈаворць ямб лахарёва’’ мэ’’ӈаваць. Мяд’ ерв вадамда тарем’ пядась:
— Тюку по’ яноць явм’ мадаӈгува’’. Ӈавна сие ниць иры’ 22 яля’ пиркана тяханя’ хэсетыва’’. Тедари’ таӈгана то’’олхава’’, сырада мэё. Яля’ холкавы сырада пи’ тяха’ ханиберӈа, нараӈэ ханӈа. Мер’ пяб’’на’’, таняна сырада мэё, нядэй сыра’ ӈылна ӈа. Тадӈо’’ ӈока тына’’ техэ яхадандо’ тамна тэвравдавэй’’. Сидя сян яля’ хэ’’мяхад ямдаванзь тасламбива’’. Ӈэсына’’ тер’’ харад’ нямна ядэрӈа’’, тарана ӈамгэдамдо’ тэмдаби’’. Хэвханана’’ мэна’’ нина’’ ӈобтикы таӈга’’, хибяхартава’’ ни паромбю’’. Теневана’’ нина’’ ма’’нисям’’, нума’’ ӈоб’’ мальӈгана ядемдаӈгуда. Мюсеб’’, пу’ хаюрма ӈани’ вэва, тан’’мы’’ хадохо’’ еребертан’, ӈадьбята ёльцяӈгананда етри’ ханаць тара. Явм’ мада’’махадана’’ тикаривна ӈоб’ мюсеӈгува’’. Тяхаку’ тэв’’махадана’’ ӈамгэ’ пират’ сенасяламдава’’ — сюундаӈгува’’. Тикава’’ ӈани’ тэтнава’ паӈо, пили’’ тэхэна мэсь тарасеты. Тедари’ тына’’ поӈгана нимы яхадейва’’ ӈобкарт яӈгу. Хахая’ мэна’’ нина’’ ӈод’’ ӈобтикы тарця юнм’ ни’’ вадес’’. Явм’ мадабавана’’ ёльцяӈгана мюва’’ пили’’ ямб ӈэсеты. Мерета еся ханхана ханона’’ солабасетына’’, ханяӈэхэна саӈговота ханона’’ ӈахакуд тяханя’ тэволэйна’’. Яханана’’ сабе ты’ ӈэхэна мюсерта яӈгу, сыранда холка’’махад’’ тына’’ мэ’’элсетына’’.
Тюку маниена сидяӈгаха’ небой по’ тадтавына’’. Тамальӈгана сидто’ ӈани’ яв’ тяха’ лакамбойтамбиваць. Тикы по мер’ хаясь, ӈэдала’’махадандо’ пудандо’ ӈани нидо’ тяханя’ нэкалӈадонзь.
Автор: М.Яр’ падвы
Авторы
Няръяна Нгэрм
Темы