Лух Авт
Ханши хуват па мират пиӆан потарӆув
Там ванан айӆат ёх актащты хотан «Орнаменты Ямала и Южного Урала» уйтантопса ус. Щита ханты мир ёх ханшет Башкирия мув ханшет пиӆан артаӆасайт. Муй йи хорпи па па хорпи нуват ханшиӆув тайӆат.
Магнитогорск вош эӆты ёхтам эви Ксения Ладванова уйтантопса тус. Мет оӆӊа, АНО «Ямал-Медиа» хоща рупитты нэ Елена Владимировна Сибарева верам кинайн альсаюв. Щита Агафья Петровна Пырысева ӆув ёра щира эватты ханшиӆаӆ эӆты потар манас. Юхат па башкир мир ёх уӆапса кина вантсув. Ӆув ищи хантэт иты, туп ӆов па ош тащӆаӆ шавиман касӆыман яӊхӆат. Вуӆы хот юкана юрта хот тайӆат. Хот ӆыпийн сох шавиты хирӆаӆ, сундук ӆаращӆаӆ, осам хирӆаӆ, ӆуматты па хот лакты сохӆаӆ иса ханшийн хораматман уӆӆат.
Потар еӆӆы манты кутан Ксения ястаӆ: «Ма иса ӆаӊхасайм нын муван вантты, муй щиран тата хоятат уӆӆат. Ванта, муӊ мувӆув па уӆты вошӆув, куртӆув Урал Кев вур кат пелак сахат уӆӆат. Муӊ хошам мув пелакан, нын па Овс муван уӆӆаты. Ханшет эӆты рупата ханшмем порайн, номасан ёхатсайм. Муй кем мир хоят уӆ, потарты ясаӊӆаӆ яха кепа ант ёхатӆат, ханши хуват потарты рахаӆ. Кашӊ нэ ёнтастаӆ порайн, ӆув мув ханшиӆаӆ ёнтаӆ. Щиӆта ныӆа, маты мув сыӆан хоят уӆ, муй войт щи муван уӆӆат, муй хорпи юхат, лыптат, торнат щита энамӆат. Муй иса моштаты рахаӆ».
Ур ёх ханшет эӆты Лариса Окотэтто потартас. Ӆув ёшан ёнтам нуй сахаӆ алиӆысӆы. Ёнтасмаӆ порайн, муй номас оха ёхтыӆыйс, ӆаварт ус, муй па кен.
Мария Александровна Ковалёва па ханты ханшет эӆты ястас. Муй нэм тайӆат, муя щимащ нэман понтсайт, муй хорпи ханши, муй арат пуш ёнтты рахаӆ.
Уйтантопсая энамты няврэмат па ёхтыӆысат. Ӆувиӆаӆа шеӊк ощхуль ус хуӆантты па вантты, муй хорпи ханшет уӆӆат. Маты ханши хоӆта ёнтты рахаӆ, муй па ант рахаӆ. Ханты нэӊӆув ёнтам ернасат умащӆыман вантсат па хор вусат.
Зоя Куртямова ханшам потар
Авторы
Лух Авт
Темы