Лух Авт
Ханты якан якемиӆув, ёшев-курэв тувемиӆув
Там таӆ сыс округ каш верты хот сот таӆаӆ постаты вераӆан, кашӊ пуш турамсот каш харат пуншиӆыйс. Ханты мирэв кутан ищи щита хоятат рупитысат, па ин рупитӆат. Там потрэм Юрий Германович Нензелов эӆты туӆэм, хоты ӆув там тахайн рупитты питас.
Тампуш хольмаӊ таӆа йис, хоты Юрий Германович аратаӆ мира каш тувман рупитаӆ. Щи тумпийн хонна хутъяӊ пеӆа ветмет таӆаӆ ищи мосванан постас. Ӆув рут муваӆ, аӊкеӆ-ащеӆ эӆты щиты ястыӆыйс:
– Ма Ващъёханов куртан сэма питсам, щита утаӆтысам. Ащикем па аӊкаӊкем касӆыман яӊхсаӊан, хуӆ веӆӆыӆысӊан. Аӊкем Марина Николаевна Нензелова Ващъёханов куртан уӆам кирпащ верыӆыйм заводан рупитас, ащем Куртямов Герман Митрофанович спортсмена ус. Няврэмат пиӆан рупитас, ӆохан касты щира утаӆтасӆы.
Ма ашкуӆа етшамем юпийн Пулӊават вошан педагогической колледжан начальной класс няврэмат утаӆтыты щира утаӆтысам. Щаӆта Ващъёханов куртэман ашкуӆайн рупитсам.
– Хоты сахат наӊ номас понтсан, якты щира уӆапсаен кератты?
– Айӆат ху усам, па нумасӆам, мосаӊ Пулӊават воша манӆам, щита рупата уйтӆам. Щаӆта, Вячеслав Озелов шуӊат, ӆухсэм манэм ястас, «Ямал» нэмпи якты хара ёх хоятат мосӆат. Щишан щи вуш эӆты ма Пулӊават вошан уӆты питсам. Юхат «Сыра’сэв» хоща якты питсам, щита хольмаӊ пеӆа йи таӆ щи рупитсам. Хон мувев аратаӆан яӊхсэв, па хон мувата ищи яӊхиӆысув. Овс мув шимӆаӊ мирӆув, муӊ шоши хоятӆув якат якиӆысӆув, алиӆысӆув. Кашӊ мув суӊан умащӆыман тайсаюв.
– Муй ӆуӆан наӊ там йис няврэмата ястасан, муй ураӊан ханты мир уӆапса еӆӆы туты мосаӆ?
– Там йисан ар рупата верӆа, шоши мир уӆапса па мирата альты ураӊан. Щишан, ун хоятата па няврэмата туп ӆаӊхаты мосаӆ, ханты верат еӆӆы туты ураӊан. Щи порайн муӊ аратаӆ мир кутан ант ӆыӆӆаӆув, ант ушӆув.
– Муӊ наӊена там таӆа питам ар емаӊ хатӆэн кеша мойӆапса ясаӊ аратаӆ ханты мирэв эӆты китӆув. Тумтака уӆа, Юрий Германович! Верытты кеменан ищиты рупита, муӊев амтатӆыя!
Аллина Тоярова ханшам потар
Авторы
Лух Авт
Темы