обновлено: 12:10, 12 декабря 2024
Лух Авт
Ханты верӆув еӆӆы туты энамты ёх
Там порайн энамты няврэмӆув шеӊк ханты ясаӊан ант потартӆат, туп самӆаӆан рут ясӊеӆ утаӆтыты па ханты уӆапсаев еӆӆы туты ӆытӆайт. Симась уйтантопсаята кашӊ порайн ханты няврэмат ёхтыӆыӆат па ӆув ӆэсятам проектӆаӆ этаӆтыӆат. Тата форуман оӆаӊ пуш уӆам ханты ёх эӆты потрэв еӆӆы туӆэв.
ЯНАО Правительство хося стажировкайн уӆ
Муравленко вош эӆты си форума Семён Мултанов ёхтыӆыйс. Ин ӆув Пулӊават вошан «Я молод» ЯНАО Правительство ӆэсятам яӆап проект хуват стажировкайн уӆ.
Хоты рупатая па форума питас, потар тус: «Ма няӆ пуш «Российский Север» форума нэпекӆам китыӆысӆам. Няӆ пуш ант вуйӆысайм.Там таӆан унт ӆор тыӆасян «Я молод» проект этас. Хон мув эӆты ярсот кат заявка нэпек ар направление хуват китман ус. Туп ветхосьяӊ хоят пирыса. Си хоятат кутан ма па Антон Русмиленко, Горка вош эӆты, ханты похӊан питсаман.
Там таӆан Сургутской государственной университет етшасэм, экологической право специальность хуват юриста утаӆтысам. Сишан природной ресурсат хося округ департамента пирысайм. Практикаев ван хатӆап тыӆась хасям хатӆат унты манаӆ. Сяӆта каматса ӆувеӆ мет яма этаӆтам хоят округ правительствая рупитты вуӆа. Яӆап таӆ тыӆась хольмаӊ пеӆа ӆапатмет хатӆ эӆты па яӆпа пирыйм хоятат стажировкая ёхатӆат.
Рупитты еӆпийн актыӆысаюв, инщассаюв, муй рупатаев тумпийн верӆув. Ма аӊкем-асем эӆты потартсам. Ӆув ёрая тайты вуӆыӆаӆ Муравленко па Надым вош кутопан тайӆаӊан. Муӊ няӆ няврэм, хоӆ ханты ясаӊан потартӆув. Там уйтантопса эӆты ястасам. Си юпийн телефон хуват каншсайм па мохты ты вохсайм.
Там йисан рут ясаӊӆув шавиты вер мет мосман тайӆа. Рут ясӊем ма уятӆэм. Ханты ясаӊан сургутской диалектан потартӆам. Сишан рут ясаӊ пиӆан рупитты хара ханшӆтантысам. Ханты ясӊем еӆӆы туты ураӊан, муй верты мосаӆ, хуӆты утсисам».
Альбина Тырлина ханшам потар
