Лух Авт
Ясаӊ китыӆыйс, еӆӆы питты верат постыӆыйс
Касаӊ таӆ Ямал мув губернатор Дмитрий Андреевич Артюхов нэӊхэт пиӆна «Прямой линия» верӆ. Тампус, щит ӆапатмет щимащ уйтантопса ус. Нэӊхэт прямой трансляция хуват инщасапсайт китсат, щит — социальной обслуживание, хат, онттыды, леккар па ёс верат пущщи. Там таӆ муӊ хощев хаттэӆ па няврем Таӆӆы лавман ос, йиты таӆ Ямал мувна Герой таӆ олта питӆ. Щитна таӆ хуват Волаӊ ляльна лялесам, итта СВО хоща олам па олты нэӊхэт, Ямал мув ораӊна ар верам, алӊищ ёхтам-геройт пущщи лаваӆта питӆа.
Лялесты ях ораӊна
Герои — муӊ кутӆуна оллат. Муӊ ӆувиӆаӆ юхы лаяӆӆаӆӆу, ляль эваӆт ёхтам нэӊхэт, хой па парта итта ант манӆ — нятӆаӆӆу, хой нэӊхэт ӆыӆ пиӆна ропытӆ, ляль манам тахайтна хощ сукатам хатат верӆат, округ развитие хоща нятӆат, ат ощӆат, муӊ ӆув пущщиӆаӆ номлу. Алӊищ холна ар мероприятие ӆэщатман ол. Топ итта щит волаӊ вер ант ол, волаӊ, щит хонты энамты нявремат ӆув пущщиӆаӆ ощта питӆат», — Ямал мув губернатор Дмитрий Артюхов лавас.
Тамхатӆ Герой таӆ сайт ропытта питас, щита нэӊхэт веритӆат айкеӆ китта, хой пущщи ӆув номастэӆна лаваӆтта масӆ. Хой пущщи нэӊхэт ат ощӆат, йи герой харты сансна ант ат хыщӆ.
Мет такан йиӆап йиты таӆ СВО хоща олты нэӊхэт па ӆув хаттэӆӆаӆ вантман тайта питӆайт. Волаӊ патриотической форум «Герой уӆапса» верӆа. Пулӊаватна олта питӆ, ловатӆна Ямал эваӆт 150 молтас нэӊху ияха акатӆа, ӆув кутӆаӆна СВО хоща олам нэӊхэт хаттэӆӆаӆ пиӆна, волонтёрат па федеральной экспертат. Тамхатӆ Ямал — ӆув орӊиӆаӆна верты нятапсэтна мет алӊищ манӆ. Муӊ региону хуват хутъёӊ мера ропытӆ.
Няврем тайты ныӊат эӆты
Ямал мув ныӊат хольмаӊ таӆ маса тайты алаӊ нявремӆаӆ ораӊна хуӆам миллион соӆкувайна сохаптаты питӆайт «Молодая семья» программа хуват. Ныӊат, хой мули 36 таӆ эваӆт мантсат па кимет, маса холмет няврем тайӆат, ох нятапсэӆ йи миллиона хайӆ. Иволап кат няврем тайты ныӊат ораӊна ох нятапсэӆ кат пус ар олта питӆ, щит пущщи губернатор ищи «Прямой линия» вермаӆ порайна лавас.
Щи мера 2025-мет таӆ эваӆт ропытта питӆ. Щиты Ямал мув кощайт муӊ хощев няврэм сэма питты вер таӆ сыс ӆапат щёрс моса эӆатта ӆытӆэӆ.
«Щимащ цифра муӊ хощев камантсы хыщам таӆ сыс ос, иӆ ант питас, итта па Ямал ищипа алӊищ кепа манӆ, топ щи цифрайт йи аямата питсат. Ма номастэмна, щимащ нятапсэт верман, нэӊхэт эӆты кон питӆ няврем энмаӆта», — Дмитрий Артюхов лавас.
Щёхар тыӆащна айкеӆ ёхтас, Ямал мувна 2024-мет таӆна ертъяӊ тыӆащ сыс 560 хаттэӆ маткапитал, хат тын хоща тайсаӆӆаӆ.
Вутн яӊхты нэӊхэт ораӊна
Ямал мувна вутн яӊхты нэӊхэт эӆты верты нятапсэт эӆатта ант волытӆайт. Ӆув аса шоши мир нэӊхэт ораӊна верты дорожной карта хоща лоӊлат па лоӊта питӆат.
«Онттыды верат ораӊна муӊ сэӊк ар нятапсы верӆу. Энамты нэӊхэт, хой вузатна онттыда манӆ, подъёмныйт ӆэщатӆайт — нийӆъёӊ щёрс, ӆувиӆаӆ масты щирна пасатта веритӆаӆӆаӆ», — Ямал мув губернатор Дмитрий Артюхов лавас.
Колледж етсаты выпускникат хат митаӆаты тынӆаӆ сохаптата питӆайт. Яӆап таӆ тыӆащ эваӆт каӆаӊ нэӊхэт йиӆаптан партонна понам ветеринарной аптечкайтна маӆайт. Санавиация пиӆна сэӊк такан лайм инщасапса ӆырамса. «Чумовой капитал» кимет няврем тайты юпина мата питӆа. Дошкольникат ораӊна подготовительной классат пунсӆайт.
Мув вантман яӊхты нэӊхэт
«Ямал мувна туризм сэӊк ямас ропытӆ, энмаӆ. Муӊ региону ораӊна щит ун онтас туӆ.
«Мув вантман яӊхты нэӊхэт ораӊна муӊ региону сэӊк ар хорамат тайӆ. Йи пелак эваӆт щит — такан энмам вуӆ васат, хата уӆапсайӆ ӆащкам, кимет па — ар таӆ акмам уӆапса щир», — губернатор лавас.
Мойӊ хоятат ёхтыӆыты онтасна ар йиӆап ропытты таха нэӊхэт ораӊна этӆ.
«Айӆат ёх хаттэӆ»
2025-мет таӆ эваӆт «Айӆат ёх хаттэӆ» программа йиӆап щирна ропытта питӆ.
Йиӆап йиты таӆ эваӆт щимащ ох нятапсы няврем тайты юпина топ мата питӆа, карра щимащ ант ос. Хой 2025-мет таӆ яӆап таӆ тыӆащ эваӆт няврем тайс па Ямал мувна ол, щимащ нятапсына мата питӆайт. Щи томпына, «Айӆат ёх хаттэӆ» программа хоща лайты ораӊна нэӊху молтас хат ант тайта масӆ.
Карра щирн маты нэпек 2027-мет таӆ ван хатӆап тыӆащна иӆ лайӆӆа. Хой мули щимащ нэпека ӆоӊаӆман уӆ, ӆув орӊиӆна олмаӆ щирна хыщӆ.
Вера Лонгортова хансам потар
Авторы
Лух Авт
Темы