Лух Авт
Касаӆты пора щи ёхтас
Каӆаңаң нэңхэт хоща, касаӆты вер щит ӆув олапсэӆ. Манты ёсӆаӆ олты хуват каӆаң эваӆт лайӆ. Каӆаңат щиты онӆаман оллат, товыйи йиӆ, ӆув ищки кансман Кев пеӆа манта питӆат. Щиты каӆаң савиты ях олты хуват ӆув юпиӆаӆна манӆат.
Касаӆты пора каӆаң нэңхэт ораңна олапсы иты манӆ. Хой олты хуват вутн яңхал, самӆаӆ йи тахайна амаста ант веритӆат. Ӆувиӆаӆ мув хорас омащ, ӆыпиӆаӆ ӆыщкамми йиӆат. Мала хорпи ищки, ватасат ӆув ар пелак ёсна оллат. Касӆыман тайты ёсӆаӆ холна йис порайна понман оллат. Щит аӆ ёсат ант оллат, олам хуват пирыям тахайт. Мет хув лайтэӆ пора, щит хонты суюват посхантӆат, па порайна ивейна манӆат.
Касаӆты хатӆ мет алаң киӆӆат, касаң хаттэӆна касаң нэңху ощӆ мала ӆув верта масӆ. Ныңат аӆ кепа ор хат паитӆат па аматӆат. Мет алаңна ор хат ӆаңкапӆаӆ нох вуӆат, щи юпина олӆаӆ хосӆат, мет ялта хойты нароңат па кор нох вуӆат. Хат паитты верат етсаты юпина кораль верӆат, щита ропытман тайты каӆаңат акатӆайт. Масты каӆаңат мощаттэт юпина анасат кирӆайт.
Карра эваӆт ки вантман, там йисна вутн яңхты олапсы консакки йис, итта каман хорпи ёр ланщ хапат оллат, нави тут тайӆат, сотовый телефонат, спутниковый связь. Топ каман йис пораят эваӆт ит топ хыщас ищиты, щит каӆаң тащат. Там мувна, каӆаң олтаӆ пущщи — каӆаң нэңхэт олта питӆат, щит йи моңхална йирам олапсы. Муң орңевна щит муң щирӆу-пищӆу, олапсэв па культураю, олты хуват манты ёс. Таматта, тамхатӆ, халэват…
Вера Лонгортова хансам потар
Авторы
Лух Авт
Темы